Баргууд Монгол хэл, ёс заншил, өв уламжлалаа хадгалсаар явна

Баргууд Монгол хэл, ёс заншил, өв уламжлалаа хадгалсаар явна

Дэлхий дээр тархсан 10 гаруй сая  Монголчуудаа бид хэрхэн мэдэх билээ. Өвөр Монгол, Дээд Монгол, Цастын Монгол. ОХУ-ын Халимаг, Буриад, Тува, Алтай гэсэн дөрвөн угсаатан байна. Мөн Ойрхи Дорнодод амьдрах Хазар, Аймак, Могол үндэстнүүд  байна. Дэлхийн өнцөг булан бүрт 10 гаруй сая Монгол угсаатан өнөөдрийг болтол үүх түүх, ёс уламжлал, эх хэлээ хадгалан хамгаалсаар байгаа тэдний туулсан зовлон жаргалыг бид хэрхэн мэдрэх билээ. Энэ удаад мянга гаруйхан километрийн  цаахна амьдарч буй ӨМӨЗО-ны Баргачуудын тухай товчхон өгүүлье. Тэд бол  шаргал түүхийн улбаанд Монгол хаадынхаа угсаанаас, зоригт Монгол цэргүүдийн удмаас үсэрсэн цус юм. Хүчирхэг Монголын үед нутаг ус, гал голомтоо сахиж үлдсэн Монголчуудын удам  БНХАУ-ын ӨМӨЗО-д өдгөө таван сая 900 мянга орчим болсоноос 100 гаруй мянга нь Барга угсаатан байна. Эртний баатарлаг түүхтэй Монгол аймгуудын нэг бол яах аргагүй  Барга. Түүхийн баримтаас үзвэл энэ угсаатны нэр нь тэртээ дөрөвдүгээр зууны сүүлээр  бичигдэж эхэлсэн гэж үздэг юм билээ.  Харин  647 онд Тан улсын бүрэлдхүүнд орж  одоогийн Буйр нуурын орчимд нутаглах болжээ. Тэр үедээ зургаан  түмэн өрх, нэг түмэн цэрэгтэй хүчирхэг аймаг байсан гэдэг. Харин зургаагаас наймдугаар  зууны үед Орхон, Туул, Хэрлэн голоор ХөлөнБуйр нуурын баруун хөвөөгөөр нутаглаж байсан тухай түүх байна. Харин есдүгээр зууны эхээр  баруун хойшоо нүүж Байгаль нуурын зүүн эргээр нутаглаж байсан хоёр  аймагтай нийлсэнээр жинхэнэ Барга Буриад угсаатан бүрэлдэн тогтох үйл явц эхэлсэн гэдгээ. Эртний түүхтэй Барга угсаатан Чингисийн алтан ургийн ээжийн талын дээдсүүд байсан гэж гэж түүхэн сурвалжид онцолсон байна.

Тэр бум хол давсан Хятад гүрэнд ёс уламжлалаа хамгаалсаар  өнөөдөртэй золгосон угсаатан бол Баргачууд.  Тэд Монгол ёстой, Монгол соёлтой, Монгол хэлтэй, Монголоо гэсэн  сэтгэлтэй, Монгол цустай хүмүүс юм....